Զամբյուղ
Ապրանք: 0
Ազդագիր
Մնացեք կապի մեջ
Բաժանորդագրվեք մեր ազդագրին և ստացեք նոր ապրանքների ու հատուկ առաջարկների մասին տեղեկություններ, ինչպես նաև՝ գեղեցկության խորհուրդներ և այլ անակնկալներ:
Ինչպես է կենսակերպն ազդում մաշկի վրա
23 Նոյեմբեր, 2017 / Մայա Ադիվի, մարքեթինգի ու վաճառքի թիմ, կոսմետոլոգ

 

Այնքա՜ն եմ խոսել առողջ մաշկին անհրաժեշտ խնամքի ու լուծումների մասին եւ դեռ այնքա՛ն կարող եմ խոսել: Բայց այս անգամ մտադիր եմ քննարկել մեր կենսակերպը, որն ազդում է մաշկի որակի վրա: Մեր մաշկն, անշուշտ, արտացոլում է մեր կենսակերպը։ Իհարկե, առողջ ապրելակերպ ընտրելու հիմնական դրդապատճառը լավ տեսք ունենալը չէ… միևնույն ժամանակ մենք «փուչ» արարածներ ենք, ու ես այդքան էլ իրավունք չունեմ դատել առողջ կյանք ընտրելու՝ յուրաքանչյուրի դրդապատճառների մասին:

Եթե ստիպված լինեմ ընտրել ամենակարևոր կանոնը, ապա կընտրեմ չափավորությունը: Թելադրողն այստեղ առողջ մարմին-առողջ մաշկ հավասարումն է: Մաշկը մեր ամենամեծ օրգանն է, եւ որքան մեր մարմինն առողջ լինի, այնքան մաշկն ավելի լավ տեսք կունենա:

1. Սննդակարգ

Սննդակարգը, հատկապես եթե մաշկի խնամքը հրատապ բնույթ է կրում, կարող է տարբերվել: Միակ կանոնը, որը վերաբերում է բոլորին՝ սնուցիչներով հարուստ, բազմատեսակ բուսական հիմքով սննդի օգտագործումն է: Օմեգա 3-ով հարուստ ձիթապտղի յուղի եւ կտավատի սերմի օգտագործումը սննդում դրական ազդեցություն ունի մաշկի վրա, հատկապես եթե խոսում ենք վաղահաս ծերացումը կանխելու մասին:

Շատերը նկատում են իրենց մաշկի բարելավումը, երբ դադարում են օգտագործել կաթնամթերք, շաքար կամ գլյուտեն, մինդեռ մյուսները նկատում են ճիշտ հակառակը: Զգայուն եւ ալերգիայի հակված մաշկը կարող է բացասական արձագանքել որոշ տեսակի սննդի, սովորաբար կծու սննդին: Ուշադրություն դարձրեք, թե ինչպես է ձեր մաշկն արձագանքում տարբեր սննդակարգերի եւ փորձել ուտել այն, ինչը ձեզ էներգիա եւ առողջություն կհաղորդի՝ առանց մաշկին վնասներ բերելու:

2. Քուն եւ սթրես

Եթե բավականաչափ չեք քնում, մաշկային խնդրից շատ ավելի մեծ խնդիրներ կարող են առաջանալ: Բոլորս էլ անքուն գիշերներից հետո այտուցված դեմքի ու աչքերի տակ սեւ շրջանակների փորձ ունենք, բայց երկարատեւ անքնությունն ու նաեւ սթրեսը իսկապես կարող են ավերածություններ գործել:

Ըստ այս համալիր հետազոտությունների՝ անքնությանն արձագանքող օրգանիզմն արտադրում է հավելյալ սթրեսի հորմոն՝ կորտիզոլ՝ ամբողջությամբ խախտելով մաշկի պաշտպանիչ գործառույթները: Դա հանգեցնում է ջրազրկման, բջիջների ավելի դանդաղ վերարտադրման, ինչն էլ իր հերթին առաջացնում է կնճիռներ ու կախ ընկած մաշկ: Այս հորմոնը կարող է խթանել կորյակային բորբոքումների աճը: Քնի պակասը կարող է նաեւ արգելակել մարմնի աճի հորմոնների արտադրությունը:

3. Ջուր

Մարմնի բոլոր գործառույթների եւ հատկապես մաշկի համար ջուրը կենսական նշանակություն ունի: Երբ մաշկը ջրազրկված է, այն դառնում է խոցելի, իսկ քրոնիկ ջրազրկված մաշկը շատ ավելի արագ է գնում ծերացման:

Մեր խմած ջուրը հասնում է մարմնի բոլոր օրգաններին շատ ավելի արագ, քան մաշկին: Չնայած ջրի բավարար օգտագործումը շատ կարեւոր է առողջության համար, դա բավական չէ մաշկի խոնավության մակարդակը պահպանելու համար: Այդ պատճառով որակյալ խոնավացնող միջոցի օգտագործումը շատ կարեւոր է:

4. Արեւահարում

Ես մի ամբողջ գրառում եմ արել արեւայրուքը սահմանափակելու կարեւորության մասին, ուստի այստեղ միայն մի քանի բան կասեմ: Արեւահարումը մաշկի ծերացման առաջին բնական պատճառն է, եւ ցանկացած մաշկաբան կասի, որ արեւապաշտպան քսուքը լավգագվույն հակատարիքային միջոցն է: Արեւի ճառագայթներն առաջացնում են քայքայիչ շղթայական ռեակցիա՝ այսպես կոչվող օքսիդացում կամ ազատ ռադիկալների վնասներ, որոնք ոչնչացնում են մաշկի բջիջները: Ավելին, երբ սեբումը (մարմնի յուղը) օքսիդանում է, մաշկն ավելի է հակվում կորյակների, իսկ ծակոտիները խցանվում են:

Որոշ մարդկանց մոտ մաշկն ավելի շատ է մելանին (գունանյութ) արտադրում որպես արեւի դեմ պաշտպանվելու միջոց: Երբեմն մաշկը հավասարաչափ կերպով մելանին չի արտադրում, ինչը հանգեցնում է մաշկի մուգ հատվածների առաջացմանը, որոնք կարող են քաղցկեղածին լինել: Եթե խոսենք չափից շատ արեւահարված մաշկի մասին, ապա վտանգների թվում առաջինը մաշկի հավանական քաղցկեղն է: Խորհուրդ եմ տալիս միշտ ուշադիր լինել ու պաշտպանվել արեւից կա՛մ արեւապաշտպան քսուքի կա՛մ մի տպավորիչ լայնեզր գլխարկի օգնությամբ:

5. Ալկոհոլ

Ալկոհոլի չափավոր օգտագործումը հիմնականում խնդիրներ չի հարուցում, չնայած կարող է վարդագույն բշտիկներ (rosacea) առաջացնել: Մինչդեռ ալկոհոլի քրոնիկ գերօգտագործումը կարող է ավերածություններ գործել: Ալկոհոլիզմի հիմնական ախտանիշը մշտապես կարմրած, ուռած կամ բորբոքված մաշկն է, քանի որ ուղեղի անոթային կարգավորման կարողությունն արգելակվում է: Այն անձինք, ովքեր արդեն իսկ ունեն մաշկային խնդիրներ՝ պսորիազ, էկզեմա, դերմատիտ եւ այլն, առավել ուշադիր պիտի լինեն, քանզի ալկոհոլի չարաշահումը կարող է հանգեցնել բորբոքային ընթացքների հաճախացման եւ սրման:

6. Ծխախոտ

Ծխախոտի ծուխը, ինչպես արեւի ճառագայթները, հարուցում է ազատ ռադիկալներ: Այդ է պատճառը, որ ողջ կյանքում ծխած մարդիկ ավելի շատ կնճիռներ ունեն իրենց բերանի շուրջ: Նրանց մաշկն ավելի հակված է պիգմենտացիայի եւ բորբոքումների: Թեպետ ծխելու առումով գլխավոր մտահոգությունը թոքերի եւ կոկորդի հնարավոր քաղցկեղն է, գիտեմ, որ հանուն բարետես արտաքինի մեզանից շատերն ավելի կհակվեն ծխելը թողնելու:

Ամփոփիչ մտքեր

Չեմ կարծում, որ այս գրառումը պետք է ասի, թե ինչպես պետք է մարդիկ ապրեն: Ի՞նչ կարիք կա լավ մաշկ ունենալու, եթե կյանքը ձանձրալի է: Մարիամի՝ իմ ընկերներից մեկի մաշկը հեշտորեն գրգռվում է իր սիրելի շատ կծու ուտելիքից: Նա որոշել էր, որ պետք է ուտի այն, ինչ սիրում է, ու բանի տեղ չի դնելու իր կարմիր մաշկը: Այդուհանդերձ, իր հարսանիքից առաջ որոշեց, որ ուզում է լավ տեսք ունենալ եւ մոտ երկու շաբաթ ոչ մի կծու բան չկերավ: Իսկ մեկ օր ա՞նց: Էստե՛ղ բերեք կայենյան պղպեղը: Արժե՜ր էսքան սպասել:

Գրեք մեզ ֆեյսբուքում, արդյո՞ք դուք էլ ունեք կենսակերպի սովորույթներ, որոնց ոչ մի կերպ չեք դավաճանի: Նույնիսկ եթե դրանք վատ ազդեցությո՞ւն ունեն ձեր մաշկի վրա: Արդյո՞ք կարծում եք, որ կարեւոր բաներ բաց եմ թողել:

Հ.Գ. Կարող եք անձնական նամակ գրել ինձ՝ maya.adivi@nairian.com հասցեով:

Մնացեք կապի մեջ
Բաժանորդագրվեք մեր ազդագրին և ստացեք նոր ապրանքների ու հատուկ առաջարկների մասին տեղեկություններ, ինչպես նաև՝ գեղեցկության խորհուրդներ և այլ անակնկալներ: